Harish Sharma

Harish Chandra Sharma, Fiji ke ek Hindustani wakiil aur leader rahaa. Uske 1987 me National Federation Party ke leader ban gais rahaa. Uu Shree Sanatan Dharam Pratinidhi Sabha of Fiji ke bhi neta rahaa.

Bachpan ke din

Sharma ke janam Nausori, Fiji me 1932 me bhais rahaa. Uu pahile ek civil servant aur insurance agent ke kaam karis aur 1960 me Tasmania, wakiili parrhe ke khatir, chalaa gais. 1964 me uske University of Tasmania se LLB mila. Fiji laute pe uu S. M. Koya aur fir A. D. Patel ke office me kaam karis. 1969 me uu aapan law firm ke kholis.

Political career

1970 me uske Leader of the Opposition, Siddq Koya, Senate me nominate karis. 1972 ke election me uu National Federation Party ke taraf se ajaad Fiji ke House of Representatives me chuna gais. Uu puura milae ke saat election larris hae aur ekko dafe nai haaris. 1987 me uu National Federation Party ke leader chuna gais jiske baad uu Fiji Labour Party ke saathe coalition banae ke 1987 ke election ke jiitis. Uske Bavadra sarkar me Deputy Prime Minister aur Minister for Housing, Urban Affairs and Information banawa gais, lekin ek mahina ke baad sarkar pe Sitiveni Rabuka coup kar ke apne leader ban gais.

1994 ke general election me , Sharma fir se Parliament me aais, Malomalo North/Nadi Rural Indian Constituency se aur Jai Ram Reddy ke niche 1999 talak Deputy Leader of Opposition rahaa. Abhi uu Sydney, Australia me rahe hae.