R. D. Patel

Template:Infobox Person Raojibhai Dahyabhai Patel, jiske R. D. Patel (nai to khaali RD) ke naam se bhi jaana jaawat rahaa, Fiji ke ek wakiil aur Legislative Council aur House of Repesentatives ke member rahaa. Uu House of Representaives ke pahila Hindustani Speaker bhi rahaa. 1966 ke election me jab uske Ba Indian Communal Constituency ke khatir National Federation Party (NFP) ke ticket milaa tab kuchh log sochat rahin ki iske kaaran ii rahaa ki uu NFP ke leader A. D. Patel ke chhota bhaiya rahaa. RD ii election ke James Shankar Singh ke virod me muskil se jiit liis. 1968 ke by-election uu ii seat ke jaada bahumati se jiitis. 1969 me jab, A. D. Patel ke maut hoe gais tab kuch loag RD ke NFP ke leader banae maangat rahin. Ii time S. M. Koya NFP ke leader banaa. 1972 ke election me RD nawaa House of Representatives me fir se Ba Indian Communal Constituency se jiitis. Iske baad uske House of Representatives ke Speaker banawa gais aur fir se kuchh log iske kaaran ii dekhin ki Koya maangat rahaa ki uske leadership ke challenge kare waala ke neutral role dewa jaawe. RD, lekin, political meeting aur Koya ke policy ke virod me bole se chuka nai. 1975 me uu Koya ke virod me Parliament se resign kar diis. By-election me uu official NFP candidate, Koya ke virod me kharra bhais lekin haar gais. March 1977 ke election me uu Lautoka Indian Communal Constituency me Koya ke virod me kharra bhais. Uu ii election haar gais lekin ii challenge Koya ke taagat kamtii kar diis aur uu aage ke election haar gais.